સુરત શહેર અને જિલ્લામાં છેલ્લા 8 કલાક દરમિયાન પડેલા ભારે વરસાદે જનજીવનને ગંભીર અસર પહોંચાડી છે. ઉમરપાડા તાલુકામાં સૌથી વધુ અંદાજે 10 ઇંચ વરસાદ નોંધાયો છે, જ્યારે સુરત શહેરમાં પણ 4 ઇંચ જેટલો વરસાદ ખાબકતા અનેક વિસ્તારોમાં જળબંબાકાર સ્થિતિ સર્જાઈ છે.
હવામાન વિભાગે સુરત જિલ્લામાં રેડ એલર્ટ જાહેર કરી આગામી કલાકોમાં પણ ભારે વરસાદની સંભાવના વ્યક્ત કરી છે. વરસાદની સ્થિતિને ધ્યાનમાં રાખીને જિલ્લા વહીવટી તંત્ર દ્વારા તમામ શાળા અને શૈક્ષણિક સંસ્થાઓને આવતીકાલે બંધ રાખવાનો નિર્ણય લેવામાં આવ્યો છે.
ભારે વરસાદના કારણે નીચાણવાળા વિસ્તારોમાં પાણી ભરાવાની સ્થિતિ ઊભી થતાં તંત્ર દ્વારા અસરગ્રસ્ત વિસ્તારોમાંથી લોકોને સલામત સ્થળે ખસેડવાની કામગીરી શરૂ કરવામાં આવી છે. સાથે જ, કોઈપણ આપત્તિજનક પરિસ્થિતિને પહોંચી વળવા માટે NDRF, SDRF અને સ્થાનિક રેસ્ક્યૂ ટીમોને તૈનાત કરવામાં આવી છે.
જિલ્લા કલેક્ટર અને વહીવટી અધિકારીઓ સતત પરિસ્થિતિ પર નજર રાખી રહ્યા છે. નાગરિકોને નદી-નાળાઓ અને પાણી ભરાયેલા વિસ્તારોમાં જવાનું ટાળવા તેમજ બિનજરૂરી મુસાફરી ન કરવા સૂચના આપવામાં આવી છે.
સુરતમાં ચોમાસાએ જોરદાર બેટિંગ શરૂ કરતાં આગામી 24 કલાક અત્યંત મહત્વપૂર્ણ માનવામાં આવી રહ્યા છે. તંત્રએ નાગરિકોને સતર્ક રહેવા અને માત્ર સત્તાવાર માહિતી પર જ વિશ્વાસ રાખવા અપીલ કરી છે.
