કચ્છ: આદિપુર પોલીસ સ્ટેશનની ટીમે ઘરફોડ ચોરીના ગુનાનો ભેદ ઉકેલી બે આરોપીઓને ઝડપી પાડતા મહત્વની સફળતા મેળવી છે. પોલીસની તપાસ દરમિયાન આરોપીઓ પાસેથી ચોરીનો લાખો રૂપિયાનો મુદ્દામાલ ઉપરાંત ગેરકાયદેસર હથિયાર અને જીવતા કાર્ટીસ પણ મળી આવ્યા હતા.
પોલીસે આરોપીઓ પાસેથી મોબાઈલ ફોન, લેપટોપ, મોંઘી ઘડિયાળો, બાઈક સહિત લાખો રૂપિયાની કિંમતનો મુદ્દામાલ કબજે કર્યો છે. તપાસ દરમિયાન મળેલા ગેરકાયદેસર હથિયાર અને કાર્ટીસને પણ પોલીસે જપ્ત કરી કાયદેસરની કાર્યવાહી હાથ ધરી છે.
આ સમગ્ર મામલે આદિપુર પોલીસ સ્ટેશનમાં ભારતીય ન્યાય સંહિતા (BNS) તેમજ આર્મ્સ એક્ટ હેઠળ ગુનો નોંધી વધુ તપાસ શરૂ કરવામાં આવી છે. પોલીસ આરોપીઓના ગુનાહિત ઇતિહાસ, અન્ય ચોરીના બનાવો સાથેની સંડોવણી અને ગેરકાયદેસર હથિયારના સ્ત્રોત અંગે પણ ઊંડાણપૂર્વક તપાસ કરી રહી છે.
પોલીસની આ કામગીરીથી વિસ્તારમાં ઘરફોડ ચોરીના બનાવો સામે અસરકારક કાર્યવાહીનો વધુ એક દાખલો સામે આવ્યો છે.
