ગાંધીનગર: વૈશ્વિક રમતગમત ક્ષેત્રે ગુજરાતને વધુ એક મોટી તક મળવાની સંભાવના ઉભી થઈ છે. 2031ની વર્લ્ડ એથ્લેટિક્સ ચેમ્પિયનશિપ અને 2028ની વર્લ્ડ એથ્લેટિક્સ અંડર-20 ચેમ્પિયનશિપના આયોજન માટે રાજ્યની ક્ષમતાનું મૂલ્યાંકન કરવા વર્લ્ડ એથ્લેટિક્સનું ઉચ્ચસ્તરીય પ્રતિનિધિમંડળ ગુજરાતની મુલાકાતે આવ્યું છે.
બિડ ઇવેલ્યુએશન પેનલના ચેરમેન એંટી ફિલ્હાકોસ્કીના નેતૃત્વ હેઠળ આવેલા પાંચ સભ્યોના પ્રતિનિધિમંડળે ગાંધીનગરમાં મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી સાથે મુલાકાત કરી હતી. બેઠક દરમિયાન ગુજરાતમાં વિકસાવવામાં આવેલી વિશ્વસ્તરીય રમતગમત સુવિધાઓ અને ભવિષ્યના આયોજન અંગે વિસ્તૃત પ્રેઝન્ટેશન આપવામાં આવ્યું હતું.
મુખ્યમંત્રી ભૂપેન્દ્ર પટેલે જણાવ્યું હતું કે રમતગમત ક્ષેત્રે ગુજરાતે છેલ્લા કેટલાક વર્ષોમાં ઝડપી પ્રગતિ કરી છે. રાજ્યમાં આંતરરાષ્ટ્રીય કક્ષાના સ્ટેડિયમ, તાલીમ કેન્દ્રો અને રમતગમત માટેનું આધુનિક માળખું તૈયાર કરવામાં આવ્યું છે, જે વૈશ્વિક સ્પર્ધાઓના સફળ આયોજન માટે સક્ષમ છે.
નાયબ મુખ્યમંત્રી હર્ષ સંઘવીએ જણાવ્યું હતું કે ગુજરાત માત્ર રાષ્ટ્રીય જ નહીં પરંતુ આંતરરાષ્ટ્રીય રમતોત્સવોનું કેન્દ્ર બનવા તરફ આગળ વધી રહ્યું છે. કોમનવેલ્થ ગેમ્સ-2030, વર્લ્ડ પોલીસ એન્ડ ફાયર ગેમ્સ સહિત અનેક મોટી સ્પર્ધાઓ માટે રાજ્ય સજ્જ બની રહ્યું છે. તેમણે નરેન્દ્ર મોદી સ્ટેડિયમ, સરદાર પટેલ સ્પોર્ટ્સ એન્કલેવ, વીર સાવરકર સ્પોર્ટ્સ કોમ્પ્લેક્સ અને કરાઈ એકેડમી જેવી સુવિધાઓનો ખાસ ઉલ્લેખ કર્યો હતો.
પ્રતિનિધિમંડળ આગામી બે દિવસ દરમિયાન વિવિધ રમતગમત સંકુલો અને ઇન્ફ્રાસ્ટ્રક્ચરની મુલાકાત લઈને યજમાની માટેની રાજ્યની તૈયારીનું મૂલ્યાંકન કરશે. આ પ્રક્રિયા પૂર્ણ થયા બાદ વર્લ્ડ એથ્લેટિક્સ દ્વારા અંતિમ નિર્ણય લેવામાં આવશે.
જો ગુજરાતને 2031ની વર્લ્ડ એથ્લેટિક્સ ચેમ્પિયનશિપની યજમાની મળે તો તે રાજ્ય માટે જ નહીં પરંતુ સમગ્ર ભારત માટે ઐતિહાસિક સિદ્ધિ ગણાશે. આ ઇવેન્ટ દ્વારા રમતગમત, પ્રવાસન, રોકાણ અને વૈશ્વિક ઓળખને નવી ઊંચાઈ મળી શકે છે.
