ગુજરાતના વાતાવરણમાં આવેલા અચાનક પલટાએ સમગ્ર રાજ્યમાં ચિંતાનું મોજું ફેરવી દીધું છે. ભરઉનાળે ફૂંકાયેલા તોફાની પવન અને કમોસમી વરસાદને કારણે ઉત્તર ગુજરાત અને સૌરાષ્ટ્રના અનેક જિલ્લાઓમાં જનજીવન પ્રભાવિત થયું છે. ખાસ કરીને ખેતી પાકોને વ્યાપક નુકસાન થતા જગતનો તાત મુશ્કેલીમાં મુકાયો છે.
બનાસકાંઠામાં તારાજી: માર્કેટ યાર્ડ અને ખેતરોમાં મોટું નુકસાન
બનાસકાંઠા જિલ્લામાં વાવાઝોડાએ ભારે વિનાશ વેર્યો છે. ડીસા માર્કેટિંગ યાર્ડમાં APMCની સૂચના છતાં ખુલ્લામાં રાખેલી બાજરી અને રાયડાની હજારો બોરીઓ વરસાદમાં પલળી ગઈ હતી. જેના કારણે વેપારીઓને લાખોનું નુકસાન થયું છે.
-
વાવ, થરાદ અને લાખણી: આ વિસ્તારોમાં વરિયાળી, ઇસબગુલ, દિવેલા અને તમાકુ જેવા રોકડિયા પાક સાફ થઈ ગયા છે.
-
કાંકરેજ: અહીં ખેતીની સાથે રહેણાંક મકાનોને પણ અસર થઈ છે. અનેક ગામોમાં મકાનોના પતરા ઉડ્યા છે અને લગ્નમંડપો ધરાશાયી થયા છે. બાગાયતી ખેતીમાં કાચી કેરીઓ ખરી પડતા ખેડૂતોને “પડ્યા પર પાટું” જેવી સ્થિતિનો સામનો કરવો પડી રહ્યો છે.
સૌરાષ્ટ્ર અને મધ્ય ગુજરાતમાં પણ મેઘતાંડવ
માત્ર ઉત્તર ગુજરાત જ નહીં, પણ સૌરાષ્ટ્ર અને અમદાવાદના ગ્રામ્ય વિસ્તારોમાં પણ કુદરતનો મિજાજ બદલાયેલો જોવા મળ્યો:
-
મોરબી અને હળવદ: હળવદ, ટંકારા અને માળિયા પંથકમાં ગાજવીજ સાથે વરસાદ ખાબકતા જીરું અને ધાણાના પાકને નુકસાનની ભીતિ છે.
-
સુરેન્દ્રનગર (લખતર): વહેલી સવારે ફૂંકાયેલા મિની વાવાઝોડાને કારણે અનેક વૃક્ષો અને હોટલોના પતરા ઉડી ગયા હતા. સદનસીબે અહીં કોઈ જાનહાનિ નોંધાઈ નથી.
-
અમદાવાદ (વિરમગામ): વિરમગામ પંથકમાં ધૂળની ડમરીઓ અને તોફાની પવન સાથે વાતાવરણ પલટાયું હતું.
-
મહેસાણા: મહેસાણામાં ભારે પવનને કારણે વૃક્ષો ધરાશાયી થયા હતા, જેમાં એક કાર પર ઝાડ પડતા વાહનને ભારે નુકસાન પહોંચ્યું છે.
