ISRO માર્ચમાં વિશ્વનો સૌથી મોંઘો સેટેલાઇટ લોન્ચ કરશે, જેની કિંમત $1.5 બિલિયન એટલે કે 12,505 કરોડ રૂપિયા છે. આ સેટેલાઇટ દર 12 દિવસે પૃથ્વીની એક-એક ઇંચ જમીનને સ્કેન કરશે.
ઇન્ડિયન સ્પેસ રિસર્ચ ઓર્ગેનાઈઝેશન (ISRO) નવા વર્ષમાં વિશ્વનો સૌથી મોંઘો સેટેલાઇટ લોન્ચ કરવાની તૈયારી કરી રહ્યું છે. તેને ISRO અને NASA દ્વારા સંયુક્ત રીતે તૈયાર કરવામાં આવ્યું છે. આ સેટેલાઇટ માર્ચમાં લોન્ચ થઈ શકે છે. તેની કિંમત 12,505 કરોડ રૂપિયા છે અને તે અત્યાર સુધીનો વિશ્વનો સૌથી મોંઘો ઉપગ્રહ હોવાનું કહેવાય છે. આ ઉપગ્રહ દર 12 દિવસે પૃથ્વીની એક-એક ઇંચ જમીનને સ્કેન કરશે. આ સેટેલાઇટ ઇકોસિસ્ટમમાં ગડબડ અને સમગ્ર વિશ્વમાં બદલાઈ રહેલા હવામાનનું અવલોકન કરશે. એટલે કે તેની મદદથી પૃથ્વી પર આવનારી કુદરતી આફતોની ઘણી હદ સુધી અગાઉથી આગાહી કરી શકાશે.
આ સેટેલાઇટનું નામ નાસા ઇસરો સિન્થેટિક એપરચર રડાર (NISAR) રાખવામાં આવ્યું છે. તેનું વજન 2,600 કિગ્રા છે. NASA અને ISRO એ સપ્ટેમ્બર 2014માં NISAR મિશન પર સહયોગ કરવા અને આને લોન્ચ કરવા માટે એક ભાગીદારી કરી હતી. આ મિશનને વર્ષ 2024માં લોન્ચ કરવાનું લક્ષ્ય રાખવામાં આવ્યું હતું. પરંતુ કોરોના રોગચાળાને કારણે તેમાં વિલંબ થયો. નાસા આ મિશન માટે એલ-બેન્ડ સિન્થેટીક એપરચર રડાર, વિજ્ઞાન ડેટા માટે એક હાઈ રેટ કોમ્યુનિકેશન સબસિસ્ટમ, GPS રિસીવર, એક સોલિડ-સ્ટેટ રેકોર્ડર અને પેલોડ ડેટા સબસિસ્ટમ પ્રદાન કરી રહ્યું છે. એ જ રીતે, ISRO આ મિશન માટે અવકાશયાન, એસ-બેન્ડ રડાર, લોન્ચ વાહન અને સંબંધિત લોન્ચ સેવાઓ પ્રદાન કરી રહ્યું છે.
સેટેલાઇટની લાક્ષણિકતાઓ
આ સેટેલાઇટની કિંમત $1.5 બિલિયન હોવાનો અંદાજ છે, જે તેને વિશ્વનો સૌથી મોંઘો સેટેલાઇટ બનાવે છે. તે 5 થી 10 મીટરના રિઝોલ્યુશન પર મહિનામાં બે કરતા વધુ વખત પૃથ્વીની જમીન અને બરફને અદ્યતન રડાર ઇમેજિંગનો ઉપયોગ કરીને મેપ કરશે. તે ધરતી, સમુદ્ર અને બરફની સપાટીને પણ મેપ કરશે અને નાનામાં નાની ગતિવિધિને પણ કેપ્ચર કરશે. વૈજ્ઞાનિકોનો દાવો છે કે આના દ્વારા સપાટીની નીચે થઈ રહેલી ગતિવિધિઓને પણ સમજી શકીશું.
આ સેટેલાઇટને ISROના GSLV-MK 2 રોકેટ દ્વારા સતીશ ધવન સ્પેસ સેન્ટરથી લોન્ચ કરવામાં આવશે. સેટેલાઇટમાં એલ-બેન્ડ અને એસ-બેન્ડ રડાર સિસ્ટમ લગાવવામાં આવી છે. એલ-બેન્ડ રડાર સપાટીની નાની હલનચલન શોધવામાં સક્ષમ છે જ્યારે ઇસરોનું એસ-બેન્ડ રડાર ઇમેજ રિઝોલ્યુશન વધારવાનું કામ કરશે. આ ઉપરાંત તેમાં 39 ફૂટનું એન્ટેના રિફ્લેક્ટર લગાવવામાં આવ્યું છે, જે ગોલ્ડ પ્લેટેડ જાળીથી બનેલું છે. તે દરેક સમયે અને સિઝનમાં રિયલ ટાઈમ ડેટા પ્રદાન કરવામાં સક્ષમ હશે.
