ભાવનગર જિલ્લા લેન્ડ રેકર્ડ વિભાગના વર્ગ-૩ના સર્વેયર તથા સિનિયર સર્વેયર કર્મચારીઓ ગ્રેડ-પે સુધારાની માંગ સાથે અચોક્કસ મુદતની હડતાલ પર ઉતરી જતાં જમીન દફતર કચેરીની કામગીરી છેલ્લા ૨૦ દિવસથી સંપૂર્ણપણે ખોરંભાઈ ગઈ છે. અગાઉ ૮ દિવસ પેનડાઉન અને ૧૯ સપ્ટેમ્બરે માસ સી.એલ. બાદ તા.૨૧ સપ્ટેમ્બરથી કર્મચારીઓ હડતાલ પર છે.
કર્મચારીઓ અને સરકાર વચ્ચે યોજાયેલી બેઠક નિષ્ફળ જતાં હડતાલ યથાવત રહી છે. ભાવનગર જિલ્લાની ૧૦ કચેરીઓમાં દરરોજ આવતી આશરે ૧૦૦ અરજીઓ મુજબ અત્યાર સુધીમાં ૨૦૦૦થી વધુ અરજીઓનો નિકાલ અટકી પડતાં અરજદારો ભારે મુશ્કેલીમાં મુકાયા છે.
હડતાલ અને ખોરંભાયેલી કામગીરી અંગેના મુખ્ય મુદ્દાઓ:
-
અટકાયેલી મુખ્ય કામગીરી: જમીન માપણી, હદ નિર્ધારણ, સીટી વિસ્તારના રેકર્ડની નિભાવણી, બિનખેતી (NA) માપણી, જમીન સંપાદન, જમીન ગ્રાન્ટ અને વાંધા નિકાલ સહિતની તમામ પ્રક્રિયાઓ ઠપ્પ થઈ ગઈ છે.
-
અરજીઓનો બેકલોગ: છેલ્લા ૨૦ દિવસથી કામગીરી બંધ હોવાથી ૨૦૦૦ જેટલી અરજીઓ પેન્ડિંગ થઈ ગઈ છે.
-
હડતાલ પછી ધસારો વધવાની શક્યતા: કચેરીનું કામકાજ પૂર્વવત થશે ત્યારે દૈનિક આવતી અરજીઓની સરખામણીએ ત્રણ ગણો ધસારો અને અરજીઓનો મારો થવાની સંભાવના સેવાય રહી છે.
હડતાલનો અંત ક્યારે આવશે તેની સ્પષ્ટતા ન હોવાથી અરજદારો પોતાના જમીન સંબંધિત કામો માટે આંદોલન સમેટાવાની આતુરતાપૂર્વક રાહ જોઈ રહ્યા છે.
