ગાંધીનગર: ડેપ્યુટી કલેક્ટર તરીકે ફરજ બજાવતા અધિકારી સામે નોંધાયેલા ભ્રષ્ટાચારના ગંભીર કેસમાં ગાંધીનગરની ત્રીજી અધિક સેશન્સ કોર્ટે મહત્વનો હુકમ કર્યો છે. કોર્ટે આરોપી વિજયભાઈ જીણાભાઈ ચૌહાણને રૂ. 25,000ના સ્થાનિક જામીન તથા તેટલી જ રકમના જામીનદાર સાથે શરતી જામીન મંજૂર કર્યા છે.
કોર્ટના દસ્તાવેજ મુજબ ગાંધીનગર એ.સી.બી. પોલીસ સ્ટેશનમાં ભ્રષ્ટાચાર નિવારણ અધિનિયમ-1988ની કલમ 7, 7(એ) તથા 12 હેઠળ ગુનો નોંધાયો હતો. ફરિયાદ મુજબ મુખ્ય આરોપી તથા અન્ય આરોપીઓએ જમીન સંબંધિત કામગીરી માટે અરજદાર પાસેથી કથિત રીતે લાંચની માંગણી કરી હોવાનો આક્ષેપ છે.
ફરિયાદના આધારે તપાસ દરમિયાન આરોપી સામે ચાર્જશીટ રજૂ કરવામાં આવી હોવાનું પણ કોર્ટે નોંધ્યું છે. દસ્તાવેજમાં જણાવ્યા મુજબ આરોપી ડેપ્યુટી કલેક્ટર તરીકે ફરજ બજાવતા હતા અને જમીન અંગેની કામગીરી સંદર્ભે લાંચની માંગણી થયાનો આક્ષેપ છે.
વિજયભાઈ જીણાભાઈ ચૌહાણ તરફે વકીલ શ્રી જે.કે.મહેતા દ્વારા મુખ્યત્વે સહ આરોપી સાથે થયેલ ટેલિફોનિક વાતચીત, પી.સી.એક્ટ મુજબ મંજૂરી તથા અન્ય સહઆરોપીઓને અગાઉ મળેલા જામીનના હુકમો અંગે રજૂઆત કરવામાં આવેલ અને નામદાર કોર્ટ દ્વારા કેસની હકીકતો તથા સુપ્રીમ કોર્ટના સંબંધિત સિદ્ધાંતોને ધ્યાનમાં લીધા બાદ આરોપીને જામીન આપવાનું યોગ્ય માન્યું હતું. જોકે જામીન સાથે કોર્ટ દ્વારા વિવિધ શરતો પણ લાદવામાં આવી છે.
આ કેસમાં ગાંધીનગરની ત્રીજી અધિક સેશન્સ કોર્ટે 14 ઓગસ્ટ, 2026ના રોજ આ હુકમ કર્યો હોવાનું કોર્ટ રેકોર્ડમાં દર્શાવવામાં આવ્યું છે.
