કેન્દ્ર સરકારનો મોટો નિર્ણય: 16 દવા કોમ્બિનેશન પર તાત્કાલિક પ્રતિબંધ
નવી દિલ્હી, તા. 20 જૂન: જન આરોગ્યની સુરક્ષાને ધ્યાનમાં રાખીને કેન્દ્ર સરકારે 16 ફિક્સ્ડ ડોઝ કોમ્બિનેશન (FDC) દવાઓના ઉત્પાદન, વેચાણ અને વિતરણ પર તાત્કાલિક અસરથી પ્રતિબંધ મૂકવાનો મહત્વપૂર્ણ નિર્ણય લીધો છે. આરોગ્ય મંત્રાલય દ્વારા જાહેર કરાયેલા આ આદેશ બાદ દેશભરમાં સંબંધિત દવાઓના ઉપયોગ અને વેચાણ પર રોક લાગુ થઈ ગઈ છે.
સરકારે જણાવ્યું છે કે નિષ્ણાત સમિતિ અને ડ્રગ્સ ટેકનિકલ એડવાઇઝરી બોર્ડ (DTAB) દ્વારા કરવામાં આવેલી સમીક્ષા દરમિયાન જાણવા મળ્યું હતું કે આ દવા કોમ્બિનેશનો માટે પૂરતું વૈજ્ઞાનિક સમર્થન ઉપલબ્ધ નથી. ઉપરાંત, આ દવાઓ દર્દીઓ માટે લાભદાયક હોવા કરતાં જોખમકારક બની શકે તેવી સંભાવનાઓ પણ સામે આવી હતી.
તપાસમાં એ પણ નોંધાયું હતું કે કેટલીક દવા કોમ્બિનેશનો “થેરાપ્યુટિક જસ્ટિફિકેશન” વગર બજારમાં વેચાઈ રહી હતી. આરોગ્ય નિષ્ણાતોના મતે આવી દવાઓનો ઉપયોગ દર્દીઓના સ્વાસ્થ્ય માટે નુકસાનકારક સાબિત થઈ શકે છે. જેના આધારે કેન્દ્ર સરકારે જાહેર આરોગ્યના હિતમાં તાત્કાલિક પ્રતિબંધનો નિર્ણય લીધો છે.
પ્રતિબંધિત દવા કોમ્બિનેશનમાં વિવિધ એન્ટીબાયોટિક્સ, પેઇનકિલર્સ તેમજ હર્બલ અને કોસ્મેટિક ઘટકો ધરાવતી દવાઓનો સમાવેશ થાય છે. તેમાં Amoxicillin, Serratiopeptidase, Cefuroxime, Paracetamol, Dicyclomine સહિતના સંયોજનોનો સમાવેશ થાય છે.
આ અંગે આરોગ્ય વિભાગે નાગરિકોને સલાહ આપી છે કે જો તેઓ પ્રતિબંધિત કોમ્બિનેશન ધરાવતી કોઈ દવાનો ઉપયોગ કરતા હોય તો તરત જ પોતાના ડોક્ટરની સલાહ લેવી જોઈએ. નિષ્ણાતની સલાહ વગર દવા બંધ કરવાને બદલે યોગ્ય વૈકલ્પિક સારવાર અંગે માર્ગદર્શન મેળવવું જરૂરી છે.
કેન્દ્ર સરકારના આ નિર્ણયને દવા સુરક્ષા અને દર્દીઓના હિતમાં મહત્વપૂર્ણ પગલું માનવામાં આવી રહ્યું છે. આરોગ્ય ક્ષેત્રના નિષ્ણાતોનું માનવું છે કે આ પગલાથી બજારમાં ઉપલબ્ધ અસુરક્ષિત અથવા બિનજરૂરી દવા કોમ્બિનેશનો પર નિયંત્રણ આવશે અને દર્દીઓની સુરક્ષા વધુ મજબૂત બનશે.
